KYUNG SEOK PARK – STUÐLA KYUNG I STRÍÐNUM FYRI BREKRÆTTINDUM

Kyung Seok hugsaði ongantíð veruliga um fólk, sum bera brek, fyrr enn hann sjálvur gjørdist ein teirra. Eftir at hann í tjúgunum var fyri eini vanlukku, gjørdist hann lamin á báðum liðum og endaði í koyristóli. Kyung Seok, sum var vanur at lesa, spæla gittara og stuttleika sær við vinum, royndi at gerast partur av samfelagnum aftur, men kom skjótt eftir at, at lívið hjá teimum, sum bera brek í Suðurkorea, ikki bara er trupult, men beinleiðis lívshóttandi. Við góðum treysti fór hann undir eitt nýtt lív sum aktivistur fyri rættindunum hjá teimum, sum bera brek.

Aktivisman hjá Kyung Seok leggur dent á almennan fólkaflutning, tí í Suðurkorea er atgongdin hjá teimum, sum bera brek, at almennum fólkaflutningi ógvuliga trupul, og fólk í koyristóli hava fingið skaða og eru enntá deyð, tá ið tey hava brúkt ótrygga útgerð á farstøðum. Uttan stjórnarstuðul til at betra um almenna fólkaflutningin eru fólk, sum bera brek, avbyrgd frá at taka fullan lut í øllum táttum í almenna lívinum, eitt nú at ferðast til arbeiðis og at liva uttan at vera bundin at øðrum.

Undir liðini á aktivistfeløgum úr felagsskapinum Samhugi – ímóti mismuni vegna brek tók Kyung Seok lut í friðarligum mótmælum í háferðslutíð og kravdi størri almenna játtan til at betra um rættindini hjá teimum, sum bera brek.

Myndugleikarnir svaraðu aftur við ólógligum valdi og hálaðu m.a. friðarlig mótmælisfólk út úr tokum og farstøðum. Almenna metrofelagið í Seoul legði fleiri revsisakarmál ímóti mótmælisfólkunum og lýsti tey sum eina almenna plágu. Í januar 2024 vórðu 400 fólk, sum bera brek, søgd úr starvi, eftir at stórbýarstjórnin í Seoul skerdi alla fígging til eina ætlan, sum gjørdi tað møguligt hjá stovnum at seta tey í starv.

Løgreglan og eitt starvsfólk hjá almenna metrofelagnum kvaldu Kyung Seok undir einum mótmælistiltaki. Hóast valdsgerðir, fleiri rættarmál og æruskemmandi herferðir heldur Kyung Seok á at stríðast.

SOLEIÐIS KANST TÚ HJÁLPA KYUNG SEOK

 

Tú kanst skriva Kyung Seok eitt samhugabræv, sum er eitt persónligt bræv til hansara og gevur honum styrki og stuðul. Ella tú kanst skriva undir undirskriftainnsavnanina og krevja, at borgarstjórin í Seoul verjir rættindini hjá teimum, sujm bera brek, m.a. rættin at savnast friðarliga, so at eingin verður sleptur upp á fjall.

Um tú skrivar eitt samhugabræv, kanst tú lata Amnesty Føroyum tey, og so senda vit Kyung Seok øll brøvini úr Føroyum.

SKRIVA FYRI LÍVI Í UNDIRVÍSINGINI

Vit halda, at tað er eitt gott hugskot at brúka Skriva fyri lívi í undirvísingini (framhaldsdeild og miðnám).

10. desembur er altjóða mannarættindadagur, sum er eitt gott høvi at undirvísa í mannarættindum. Í hesum sambandi halda vit, at tað eisini er eitt gott hugskot at skriva brøv saman við næmingunum, tí so fáa næmingarnir amboð at gera ein ítøkiligan mun fyri at betra um mannarættindastøðuna úti í heimi. Málini, vit í ár skriva fyri, er eisini ein góður máti at ítøkiligera, hvørja ávirkan mannarættindabrot hava fyri einstakar persónar.

Persónarnir, vit í ár skriva fyri, hava til felags, at teirra rættur at mótmæla ikki hevur verið virdur. Hetta er eitt óhugnaligt rák, sum vit síggja um allan heim – eisini í londum tætt við hjá okkum.

Skriva fyri lívi kann brúkast í fleiri lærugreinum t.d. samfelagsfrøði, søgu, landafrøði og málsligu lærugreinunum.

NÓGV OG YMISKT TILFAR

Vit hava nógv ymiskt tilfar um Skriva fyri Lívi og hvussu tað kann brúkast í undirvísingini:

• kunning um Skriva fyri lívi (á føroyskum)
• hugskot til, hvussu Skriva fyri lívi kann verða brúkt í undirvísingini (á føroyskum)
• vegleiðing til, hvussu Skriva fyri lívi kann brúkast í undirvísingini (á enskum)
• undirvísingartilfar frá altjóða deild (á enskum), og undirvísingartilfar á enskum til allar sakirnar (á enskum)
• undirvísingartilfar frá donsku deild (á donskum)
  

Og tilfar og kunning um mannarættindaevni, ið knýta seg at málunum, vit í ár skriva fyri:

• um mannarættini, Nám og Amnesty Føroyar (á føroyskum)
• heimsyvirýsingin (einføld útgáva á føroyskum)
• heimsyvirlýsingin við uppgávum (á føroyskum)
• kunning um rættin at mótmæla (á enskum)
• kunning um talufrælsi (á enskum)
• kunning um veðurlagsrættvísi (á enskum)
• kunning um rættindi hjá upprunafólkum
• undirvísingartilfar um talufrælsi (á dosnkum)

Amnesty Academy er ein talgildur skeiðsdepil við hópin av ókeypis skeiðum í mannarættindum, m.a. um:

• talufrælsi
• rættin at mótmæla
• veðurlagsrættvísi

Skriva eitt bæv í hond

Tað ber til at gera samhugabrøvini persónlig við at skriva brævið í hond og prýða brævið við tekningum. 

Tit gera sjálvi av, um tit brúka postkort, vanlig pappír ella okkurt triðja. Vit hava gjørt skapilónir til kort, sum tit sjálvi kunnu printa út og klippa til. 

Skriva eitt bræv á telefonini

Eisini ber til at skriva eina persónliga heilsan á telefonini. Á instagramsíðuni hjá Amnesty International Føroyum hava vit goymt skapilónir undir ‘highlights’. Tit kunnu brúka tær (ella gera tykkara egnu) og skriva eina heilsan og so sjálvandi pynta við emoji-um. Aftaná kunnu tit senda heilsanina til okkum á instagram, og vit senda heilsanina saman við øllum hinum heilsanunum úr Føroyum.

Um tú og tín flokkur kundu hugsað tykkum at fingið vitjan av umboði frá Amnesty Føroyum, koma vit ógvuliga fegin framvið. Sendið ein t-post til turid@amnesty.fo.

Í ÁR SKRIVA VIT EISINI FYRI