DIANA REYNSTIND: EG HEVÐI YNSKT, AT STÓRA AVGERÐIN IKKI LÁ Í MÍNUM HONDUM
Ynskja kvinnur í Føroyum abort, skulu kommunulækni og lækni í kvinnusjúkum á Landssjúkrahúsinum meta um, hvørt kvinnan lýkur krøvini, sum lógin ásetur.
Diana Reynstind er burðarfrøðingur og serlækni í kvinnusjúkum á Landssjúkrahúsinum, og er tí ein av læknunum, sum skal játta ella nokta kvinnum abort, tá ið tær hava ynski um tað. Dianu dámar illa hesa støðuna og hevur hon eitt vald, hon ikki ynskir at hava.
“Eg havi 20 minuttir at meta um, um kvinnan lýkur krøvini fyri at fáa abort. Eg kenni ikki kvinnuna, og tað er óunniligt, at tað verður lagt upp til, at eg skal gera eina moralska meting av henni. Eg hevði ynskt, at stóra avgerðin ikki lá í mínum hondum” sigur Diana.
Abortir eru eitt trygt inntriv, og er ikki ein læknafrøðiligur spurningur, sigur Diana. Tað er ein persónlig avgerð hjá kvinnum at taka, og tí tyngir tað Dianu, at hon skal taka hesa avgerð – ein avgerð, sum kann hava stórar fylgir fyri kvinnuna, noktar Diana kvinnuni eina abort, leggur hon afturat. “Lógin leggur ábyrgdina av einari avgerð um lívið og familjuna hjá kvinnuni á meg heldur enn á kvinnuna sjálva” sigur Diana.
Diana fylgir lógini, og játtar bert abortum, tá kvinnan lýkur krøvini í lógini. Tó veit hon, at kvinnur, sum ynskja abort, kenna lógina, og vita, hvat skal til fyri at fáa eina abort. “Kvinnurnar vita, at tær skulu siga, at vandi er fyri at teirra angist brýtur út, ella at tær umhugsa sjálvmorð” sigur Diana. “Sjálvandi haldi eg meg til lógina” sigur Diana, men hon situr tó altíð við einum ótta, tá hesar avgerðirnar skulu takast. Føroyska abortlógin ásetur nevniliga, at læknar kunnu fáa tvey ára fongsulsrevsing, um teir fremja eina abort uttan at krøvini, ið lógin ásetur, eru lokin.