ST-samtykt skal slóða fyri varandi vápnahvíld
Í gjár tók Trygdarráð Sameindu Tjóða undir eini samtykt um vápnahvíld, “sum varir allan mánaðin Ramadan er, og skal føra til eina varandi og haldgóða vápnahvíld”. Harumframt stendur í samtyktini, at gíslar skulu beinanvegin og treytaleyst leyslatast, og at humaniter hjálp skal loyvast inn í Gasageiran. Agnès Callamard, altjóða aðalskrivari hjá Amnesty International, segði:
– samtyktin átti at verið komin fyri langari tíð síðan, men fyri veruliga at bøta um sivilu líðingina og gera nakað við hópoyðingina og líðingina í Gasa, er alneyðugt, at samtyktin verður sett í verk alt fyri eitt og at hon førur til varandi vápnahvíld”.
– Tíðin má ikki fara til spilis. Ísraelskir myndugleikar mugu beinanvegin støðga ræðuligu bumbuálopunum á Gasageiran og lætta um at veita av humanitera hjálp. Ísrael, Hamas og aðrir vápnaðir bólkar mugu eisini virka fyri at tryggja, at vápnahvíldin verður støðug. Sivilir fangar mugu leyslatast beinanvegin. Allir palestinar, sum uttan ákæru eru hildnir í ísraelskum fongslum, herav sivil úr Gasa, skulu eisini leyslatast.
– Palestinar í Gasa eru í vanda fyri fólkamorði, fleiri enn 32.000 fólk eru dripin, børn eru deyð í hungri orsaka av hóttandi, tilrættisløgdu hungursneyðini og stór øki í Gasa eru ólivilig av ógvusligu ísraelsku bumbuálopunum.
– Hendan samtyktin má koma við einum broyttum politiskum trýsti, herav einum umfevnandi vápnabanni beinanvegin, føra til ein varandi støðg í stríðnum og broyta ræðuligu støðuna í Gasageiranum við framtíðini í huga.
– at atkvøða í ST-trygdarráðnum seinastu vikurnar er sokkið til eitt skilaleyst politiskt spæl við syndarligum avleiðingum fyri sivil, har føstu limirnir í Trygdarráðnum, herav USA og Russland, hava misnýtt teirra vetorætt at forða fyri øðrum samtyktaruppskotum. Altjóða samfelagið má nú leggja politiska spælið til síðis og raðfesta at bjarga lívum við at tryggja, at hendan samtyktin slóðar fyri eini varandi vápnahvíld.
– Fyri sín lut átti USA, sum áður hevur lagt veto til tríggjar samtyktir um kravda vápnahvíld, at kravt vápnahvíld beinanvegin, átti at støðga øllum vápnaflutningi til Ísrael og brúkt sína støðu sum lyklastuðul at fingið Ísrael at góðkent kravið um eina støðuga vápnahvíld og at loyva humanitera hjálp ótarnað inn í Gasageiran.