Tann 24. mars handtók ísraelska løgreglan Khaled Al Serr, meðan hann var til arbeiðis sum skurðlækni á Nasser-sjúkrahúsinum har suðuri í Gazageiranum. Familjan veit framvegis einki, hvar ið Khaled er, hvussu honum veit við, og hví hann varð handtikin. Ísraelskir myndugleikar eiga beinanvegin at sleppa Khaled og øðrum palestinskum heilsustarvsfólkum, sum eru horvin við tvingsli, leysum.

Tá ið ísraelsk herlið tann 24. mars kringsettu Nasser-sjúkrahúsið í býnum Khan Yunis har suðuri í Gazageiranum, valdi Khaled Al Serr at verða verandi í bygninginum og taka sær av teimum mongu sjúklingunum. Tá ið bygningurin varð rannsakaður, varð tann 32 ára gamli skurðlæknin handtikin saman við fleiri starvsfeløgum, hóast hann sambært upplýsingum hjá Amnesty stóð og útinti sítt læknayrki. Í vápnaðum stríði skulu heilsustarvsfólk og sjúkrahús virðast og verjast og ongantíð gerast álopsmál.

Skeggroyttur við tong

Leyslatnir starvsfelagar kunnaðu familjuna hjá Khaled um, at hann var handtikin. Ein teirra boðaði miðlunum frá, at hann hevði sæð Khaled verða píndan, m.a. verða skeggroyttan við tong.

Amnesty og aðrir óheftir mannarættindafelagsskapir hava savnað inn vitnisfrágreiðingar hjá palestinskum heilsustarvsfólkum, sum kort síðan eru leyslatin. Frágreiðingarnar benda á, at bæði ísraelski herurin og ísraelska fongsulsverkið regluliga pína og fara illa við handtiknum heilsustarvsfólkum.

Nógv horvin heilsustarvsfólk

Familjan hjá Khaled veit framvegis einki, hvar ið hann er, hvussu honum veit við, og hví hann er handtikin. Nógv teirra, sum undir ómenniskjaligum umstøðum gera sítt ítasta at hjálpa særdum undir ísraelsku loftálopunum í Gaza, hava fingið somu lagnu.

Sambært Heimsheilsustovninum, WHO, eru síðan novembur 2023 í minsta lagi 214 heilsustarvsfólk handtikin, meðan tey hava verið til arbeiðis. Og sambært palestinska heilsumálaráðnum eru í minsta lagi 106 heilsustarvsfólk annaðhvørt horvin ella afturhildin – nógv teirra undir slíkum umstøðum, at tey kunnu sigast at vera horvin við tvingsli.

Álop á illa spert heilsuverk

Fongsling og heilsustarvsfólk, sum hvørva við tvingsli. Hetta hevur verið fastur táttur í sambandi við ísraelsku álopini á heilsuverkið og undirstøðukervið í Gaza, har ið heilsustarvsfólk mugu arbeiða alt samdøgrið uttan mat og drekka og uttan nøktandi medisinska útgerð og brennievni orsakað av ísraelska stongslinum.

Sambært ST-skrivstovuni fyri samskipan av humaniterum viðurskiftum vóru bara 16 av 36 av teimum týdningarmestu sjúkrahúsunum í Gaza – sum vanliga tæna meira enn tveimum milliónum fólkum – tann 5. juni lutvíst virkisfør við álvarsliga avmarkaðum veitingum.

Afturhildin onga rættarvernd

Síðan 7. oktobur 2023 – og ikki minst síðan atgerðirnar á landjørðini í tí hertikna partinum av Gazageiranum byrjaðu – hava ísraelskir myndugleikar brúkt eina serliga lóg – lóg um ólóglig stríðandi – og aðrar fyriskipanir, sum ikki eru nærri lýstar, til at halda palestinum í túsundatali aftur.

Tey afturhildnu fáa ikki at vita, hvat ið tey eru skuldsett fyri, og fáa hvørki sakførarahjálp ella rættvísan rættargang. Tey fáa heldur ikki samband við umheimin og hava sostatt onga rættarvernd.

Grov brot á skyldurnar hjá Ísrael

Tað, sum greitt er frá omanfyri, er saman við væl skjalprógvaðari píning og aðrari ringari viðferð av fongslaðum palestinum – serliga úr tí hersetta Gazageiranum – grovt brot á altjóðarættarligu skyldurnar hjá Ísrael, samstundis sum tilvildarlig fongsling undir vápnaðum stríði og hertøku er krígsbrotsverk. Sambært Róm-reglugerðini fyri altjóða revsidómstólin (ICC) kunnu gerðirnar – verða tær framdar sum liður í víðfevndum ella skipaðum álopi á tað vanliga fólkið – vera brotsverk ímóti mannaættini.

Um tú hevur spurningar, kanst tú seta teg í samband við okkum á tel 235819 ella við at senda ein teldupost til elsa@amnesty.fo.