Undirskriftainnsavnanin er liðug. Undirskriftirnar vórðu sendar Benjamin Netanyahu 21. mars 2023.
Palestinar í milliónatali liva undir ísraelsku apartheidskipanini og eru fyri mismuni og undir ísraelskum ræði og eftirliti. Ísrael ger seg dagliga inn á palestinsk rættindir, millum annað við at sýta palestinum eitt heim. Skriva undir átakið og krev, at Ísrael gevst at reka palestinar burtur við tvingsli og ríva heimini hjá teimum niður.
Í meira enn 73 ár hevur Ísrael við valdi rikið heil palestinsk samfeløg burtur og rivið palestinsk heim í hundraðtúsundatali niður. Tað hevur elvt til ræðulig traumur og líðing. Meira enn seks milliónir palestinar liva sum flóttafólk í øðrum londum. Í dag eru 150.000 fólk í veruligum vanda fyri at missa heimið hjá sær í Ísrael og teimum hersettu palestinsku økjunum.
Skriva undir og mótmæl niðurrívingum, og at palestinar verða burturriknir við tvingsli.
Lóggávumismunur
Ísrael hevur skapt og hildið uppi eini skipan við lógum og politikkum, sum tilvitað kúga og stýra palestinum. Til dømis við at taka land, tilfeingi og ognir frá teimum. Ísraelskir myndugleikar fremja hópniðurríving av palestinskum húsum, sum eru bygd uttan loyvi. Loyvir, sum palestinar skulu biðja um hjá ísraelskum myndugleikum, men sum av vana verða sýtt teimum. Tí er ómøguligt hjá palestinum at byggja sær eitt heim.
Palestinski Mohammed Al-Rajabi búði í Al-Bustan-økinum í Silwan í Eysturjerusalem. Tað nýggja heimið hjá familjuni varð oyðilagt og niðurrivið av ísraelskum myndugleikum tann 23. juni 2020, tí at tað var bygt ”ólógliga”. Her greiðir hann Amnesty International frá, hvussu traumatiserandi hetta var hjá honum og familjuni:
”Tað hevur verið ómetaliga trupult at handfara. Tað er torført at seta orð á … og tað var uppaftur verri hjá børnunum enn hjá okkum. Tey vóru ovurfegin um, at vit júst høvdu fingið eitt nýtt heim […] Ætlanin var, at tey skuldu eiga eitt fjálgt heim í nánd av sínum kæru. Nú má eg lata teimum minnini um, at tað fyrsta barnaheimið hjá teimum varð oyðilagt.”
Mohammed Al-Rajabi
Tí brúka vit heitið ’apartheid’
Apartheid er brotsverk ímóti mannaættini og verður framt við tí serstaka endamálinum at halda uppi eini ræðuligari skipan, har ið ein fólkabólkur hevur eftirlit við og yvirræði yvir einum øðrum.
Kanningarfólk hjá Amnesty International hava í fýra ár skjalfest, hvussu ísraelskir myndugleikar troka palestinar burtur við at oyðileggja húsini hjá teimum, sýta teimum byggi- og uppihaldsloyvi og sýta palestinskum flóttafólkum at koma heim aftur í upprunaheimið hjá sær. Tey rúgvismiklu skjalprógvini hjá okkum vísa, hvussu Ísrael tilvitað kúgar palestinar og gevur teimum lægri støðu í landinum enn ísraelum.
Mohammed Al-Rajabi búði í húsunum í tveir mánaðir, áðrenn tey vórðu niðurrivin.
”Av tí at húsini hjá mær lógu miðskeiðis í einum ovfyltum øki, bar ikki til at ríva tey niður við bulldosara. Tí brúktu teir elsagir til at skera húsini sundur. Alt fyri, at tað ikki skuldi vera búgvandi. […] Tað slapst ikki undan tí. Skipanin tykist vera sniðgivin til at vera soleiðis, og har er eingin útvegur. Húsini hjá mær skuldu rívast niður undir øllum umstøðum, sama hvat ið eg gjørdi. Kommunan bað meg eisini rinda sær fyri niðurrívingina. Hon skal hava NIS 100.000 [208.734 DKK] fyri útreiðslurnar av at ríva húsini hjá mær niður.”
Tak frágreiðingina niður her >>
Krøvini hjá okkum
Vit krevja, at ísraelski forsætisráðharrin, Naftali Bennett, beinanvegin:
- tekur aftur øll ísraelsk boð um reka fólk burtur við tvingsli og ríva húsini hjá palestinum í Ísrael og teimum hersettu palestinsku økjunum niður og
- fær burturraksturin av palestinum við tvingsli at halda uppat endaliga.
