Fongslið í Guantánamo er tiltikið fyri sínar harðrendu píningarhættir. Latið okkum krevja av tí nývalda amerikanska forsetanum, Joe Biden, at hann steingir fongslið endaliga.
Í hernaðarfongslinum í Guantánamo Bay á Kuba sita framvegis 40 mans fongslaðir í óvissa tíð. Teir hava allir verið fongslaðir í minst 12 ár – teir flestu, uttan at ákærin hevur reist ákæru, og uttan rættvísan rættargang. Nógvir teirra eru vorðnir píndir.
Fimm av monnunum eru langt síðan góðkendir at verða fluttir í onnur lond, men sita við sama lag fongslaðir í óvissa tíð. Viðferðin, teir hava fingið í Guantánamo, er greitt mannarættindabrot, og vit krevja av Biden-stjórnini, at viðferðin heldur uppat beinanvegin!
Hjálp okkum at steingja Guantánao! Skriva undir átakið nú!
Skuldi goyggja og spæla hundur
Mohamedou Ould Slahi sat í 14 ár í Guantánamo, til hann varð leyslatin í 2016. Hann greiðir frá, hvussu hann varð settur í ein avbyrgingarkliva, tey kallaðu ’køliskápið’. Hetta var ein lítil, kritahvítur og ógvuliga niðurkøldur klivi við ongum dagslýsi. Her sat hann í 70 dagar og varð avhoyrdur upp í saman við ongum svøvni í upp í 20 tímar um samdøgrið.
”Eg gjørdist alt meira fjálturstungin og østi meg av ongum. Eg græt um smáting. Undir avhoyringunum varð eg díktur undir í vatni í hesum ísakalda rúminum. Eg var so stirðnaður, at eg fekk ikki tosað.”
Mohamedou Ould Slahi
Sambært avhoyringarfrágreiðingini varð hann tvingaður at goyggja og spæla hundur í klivanum. Hann varð úrlatin og kropskannaður og noyddur at ganga í burku. Fangavørðirnir høvdu sjefarahundar við sær, sum teir hóttu við at beita eftir honum. Maturin, hann fekk, var fullur í mold, meyrum og møðkum.
Sum liður í píningini settu fangavørðirnir umaftur og umaftur sama sang for frá í klivanum hjá honum við stroboskopljósi afturvið. Teir noyddu hann at drekka saltvatn og fyltu fangabúnan við ísterningum. Alt samalt fyri at ”bróta sjálvsvirðið hjá honum niður og fáa takið á sinninum og likaminum hjá honum”, stendur í frágreiðingini.
Biden hevur fyrr lovað at steingja fongslið.
Sum varaforseti lovaði Joe Biden í 2009 at steingja fongslið:
”Amerika vil ikki pína. Vit vilja virða øll rættindini hjá teimum, sum vit seta fyri ein dómara. Og vit fara at steingja afturhaldsmiðstøðina í Guantánamo Bay …”
Joe Biden
Nú kunnu vit saman heita á Biden sum nýggjan forseta í USA um at halda orð. Fram ímóti 20 ára degnum fyri yvirgangsatsóknina tann 11. septembur hevur Joe Biden møguleika at vísa, at USA strembar eftir rættvísi og bindur seg til at halda mannarættindini.
Fortel Joe Biden, at Guantánamo-fongslið skal steingjast endaliga!
OKKARA KRØV
Vit krevja, at myndugleikar í USA:
- steingja Guantánamo beinanvegin,
- syrgja fyri, at allir fangar í Guantánamo annaðhvørt verða leyslatnir, skuldsettir og settir fyri ein samveldisdómstól ella fluttir í eitt land, sum virðir mannarættindini,
- syrgja fyri, at øll, sum eru vorðin pínd og á annan hátt illa viðfarin í Guantánamo, fáa atgongd at endurmenning og uppreisn og
- syrgja fyri, at øll tey, sum hava ábyrgdina av píning og tvingsilshvørvingum, verða drigin til svars.
BAKSÝNI
Nýggj frágreiðing varpar ljós á viðurskiftini í fongslinum
Tann 11. januar vóru 19 ár liðin, síðan fongslið læt upp. Í tí sambandi kunngjørdi Amnesty International frágreiðingina ”USA: RÆTTIÐ SKEIVLEIKAN”. Í frágreiðingini harta vit USA fyri, hvussu fangarnir verða afturhildnir í Guantánamo, fyri píningina, sum nógvir teirra hava verið fyri, og fyri ta vantandi rættartrygdina í fongslinum.
HVÍ SKAL EG SKRIVA UNDIR?
Hvør einasta undirskrift ger sítt til at leggja trýst á Joe Biden, so at hann vónandi steingir fongslið í Guantánamo.