SAUDIARABISKA MANNARÆTTINDASTRÍÐSKVINNAN NASSIMA AL-SADA HEVUR SÍÐAN JUNI 2018 VERIÐ FONGSLAÐ ORSAKAÐ AV SÍNUM STRÍÐI FYRI KVINNURÆTTINDUM. SKRIVA UNDIR, SO AT HON KANN VERÐA LEYSLATIN.
Nassima al-Sada situr framvegis í fongsli fyri sítt friðarliga virksemi til at bøta um rættindini hjá kvinnum í Saudiarabia. Hon hevur eitt nú virkað fyri rættinum hjá kvinnum at koyra bil og ímóti skipanini við mannligum verjum.
Síðan februar í ár hevur hon sitið avbyrgd í al-Mabatith-fongslinum í Dammam.
FONGSLAÐIR AKTIVISTAR
Mannarættindastríðsfólk í Saudiarabia eru undir stórum trýsti, og Nassima al-Sada er ikki tann einasta, sum hevur verið noydd at rinda ein høgan prís fyri sítt mannarættindavirksemi. Síðan hálvan juli hava saudiarabiskir myndugleikar handtikið í minsta lagi 15 mannarættindastríðsfólk, sum øll hava virkað fyri at bøta um rættindini hjá kvinnum í landinum. Fleiri teirra hava sagt frá, at tey eru vorðin pínd og hava verið fyri kynsligum harðskapi í fongslinum.
Hjálp okkum at senda Nassimu og hinum djørvu mannarættindastríðsfólkunum í Saudiarabia okkara stuðul. Hesi fólkini vága sítt frælsi í stríðnum fyri vinna sær sjálvum og komandi ættarliðum eitt betri lív.
VIÐ AT SKRIVA UNDIR HJÁLPIR TÚ OKKUM AT LEGGJA TRÝST Á SAUDIARABISKAR MYNDUGLEIKAR AT FÁA TEIR SLEPPA NASSIMU AL-SADA OG HINUM MANNARÆTTINDASTRÍÐSFÓLKUNUM LEYSUM BEINANVEGIN OG TREYTALEYST.
BAKSÝNI
Í Saudiarabia eru gentur og kvinnur fyri mismuni gjøgnum alt lívið. Skipanin við mannligum verjum ber í sær, at ein kvinna í Saudiarabia skal hava samtykki frá einum mannligum húsfólki, tá ið hon skal taka avgerð um alt frá útbúgving til ferðir, og tá ið hon skal seta seg í samband við almennar myndugleikar.
Tey seinnu árini eru nøkur fá – men týðandi – framstig gjørd, tá ið ræður um kvinnurættindir í Saudiarabia. Eitt nú varð koyriforboðið sett úr gildi í juni 2018. Men ikki allar kvinnur sluppu at seta seg við róðrið. Fleiri kvinnurættindastríðsfólk, sum í fleiri ár hava stríðst fyri rættinum at koyra bil, sótu nevniliga í fongsli, tá ið forboðið varð sett úr gildi. Teirra millum tær tríggjar oddakvinnurnar í stríðnum fyri rættinum hjá kvinnum at koyra bil: Loujain al-Hathloul, Iman al-Nafjan og Aziza al-Yousef. Eisini fingu fleiri aktivistar boð um ikki at siga nakað alment um tíðindini.
Hóast framstig síggjast, eru mannarættindini enn undir stórum trýsti í Saudiarabia. Allar atfinningar mótvegis myndugleikunum verða harðliga revsaðar. Vága aktivistar og mannarættindastríðsfólk sær at finnast at myndugleikunum, verður tað hevnt við órættvísum rættarmálum, lívlangari fongsulsrevsing og í versta føri deyðarevsing.